SHIN AKWAI ALLAH?

Mafi shahara cikin masana kimiyya a tarihin duniya, Albert Einstein, ya yi wasu maganganu guda biyu: Na farko “Kimiyyar da babu addini gurguwa ce sannan addini ba tare da kimiyya ba makaho ne” sannan ya ce “Kimiyya na iya bayanin yadda abubuwa su ke a zahiri amma ba za ta iya bayanin dalilin kasancewa yadda su ke ba” Addini da kimiyya sun kasance abubuwa guda biyu da su ka fi komai tasiri a rayuwar Dan Adam, duk da cewa kowanne akwai irin mahangarsa. Don haka ya kamata mu fahimci cewa abubuwa ne masu cikakkiyar alaka tamkar dai fuskoki guda biyu na kwabo. Alal misali mun san a kimiyance yadda sammai da kasa su ka samu kimanin shekaru biliyan 13 da su ka wuce daga tarwatsewar Big Bang, amma kimiyya ba ta da bayanin dalilin samuwar wannan sammai da kassai, addinai kadai ke iya wannan bayani. Mun san cewa a kimiyance duk hasken da ya daki madubi, kashi 95% ya kan dawo baya (reflect) amma kimiyya ba ta iya gane dalilin da ya sa ragowar kashi 5% ke ratsawa ta cikin madubin ya wuce. Don haka kimiyya na iya mana bayanan dalilan da abubuwa ke wanzuwa yadda su ke amma addinai ke iya bayanin me yasa hakan ke faruwa.

Idan mu ka dauki Dan Adam, mun san ya na kasancewa cikin tagwayen tsarin jiki da ruhi. Jiki na kasancewa tsani na wanzuwar rayuwarsa, amma rai ke sako shi cikin tsarin (wato lokacin haihuwarsa) ko kuma ya cire shi cikin tsarin (lokacin mutuwa). Kimiyya na iya nazarin jikin Dan Adam ta kowanne fanni amma ba ta iya nazarin ruhi, domin ya zarce gwadaben da ta ke da iko. Wannan dalili ya tabbatar da cewa duniya na karkashin tsarin zahiri da badini. Amma kasancewar masana kimiyya sun sami damar iya nazarin duk abubuwa na zahiri su fahimci tsarinsu, sai wasu ke ganin ai babu dalilin cewa badini na da wani tasiri don haka ma su ke ganin cewa babu Allah. 

Shin Akwai Allah? Tabbas akwai Allah. To amma shin muna da bukatar sai an tabbatar da hujjar cewa ya na nan a zahirance? A’a, domin kamar yadda ba ma iya tabbatar da samuwar ruhi (ko rai) a zahirance haka nan babu yadda za’a iya tabbatar da samuwar Allah a zahirance domin shi ba jiki ba ne don haka duk wata hanyar sadarwa ta zahiri da muke da ita ba za ta iya tsinkayar Allah ba. Amma a hankalce da hujjoji masu karfi na zahiri karkashin ilimin kimiyya Allah da kansa ya tabbatar mana da samuwarsa ta hanyoyi guda hudu:

1. Shi kadai ke iya samar da rai-

Q21:30 “Shin kuma wadanda su ka kafirta, ba su gani cewa lallai...kuma mun halicci dukkan mai rai daga ruwa?”

Allah a cikin wannan aya ya tabbatar mana da cewa shine ya halicci duk wani abu mai rai, don haka duk wani wanda ke ja da wannan hurumin na Ubangiji sai Allah ya kalubalance shi a Qur’ani da cewa

Q22:73 “Ya ku mutane! Ga wani misali ku saurara zuwa gare shi, lalle ne wadanda ku ke kira baicin Allah, ba za su iya halitta kuda ba, ko da sun taru gare shi”.

Hakika kimiyya ta fahimci yadda rayuwa ta samu a doron wannan duniya tun daga farkon lokaci a ruwa, amma kuma kimiyyar ta gaza wajen gane daga ina wannan rayuwa ta samo asalinta. Matsalar gano daga inda rayuwa ta samo asali a wannan duniya a kimiyance, ya zama kasawa domin cikin masana kimiyya da ke kan gaba wajen wannan bincike, wato Stanley Miller cewa ya yi “Hakika asalin rayuwa a wanna duniya ya zama abu mafi shiga duhu a gare ni da sauran mutane”. Shi kuma Simon Conway cewa ya yi “An kasa kirkirar sabon rai a dakunan binciken kimiyya, kuma babu wata alama za’a iya yin hakan a nan gaba…samuwar rai a wannan duniya ya zama mu’ujiza”. Shi ma wani shahararren a wannan fannin na binciken asalin rai, Francis Crick cewa ya yi “Duk wani mai gaskiya, wanda ke da masaniyar ilimin da muke da shi a yanzu, zai yadda cewa samuwar rai kawai mu’ujiza ce”. Shi ma masanin Falsafa Karl Popper cewa ya yi “Ci gaban da aka samu game da ilimin halittu masu rai, maimakon ya haskaka yadda rayuwa ta fara samuwa sai ma ya dada tura abubuwa cikin duhu”.

Cikin Babban kundin nazarin halittu masu rai (Encyclopedia of the Biological Sciences) masanan kimiyya wadanda su ka nakalci kowanne fanni da ya jibinci ilimin halittu masu rai da kansu cewa su ka yi “Tsarin yadda halitta ta samu a doron duniya daga abubuwa mara sa rai sau daya ya taba faruwa, kuma duk wani yunkuri na kokarin samar da kowacce irin halitta mai rai a dakunan binciken kimiyya ya gagari masana”

Tsarin kimiyyar Asalin Halitta na Charles Darwin, duk da gagarumar fahimta da ya kawo cikin nazarin asalin halittu, bai iya kawo wani bayani game da daga ina rayuwa ta samu ba. Duk aikin Darwin ya kebanta ne daga yadda halittu su ka habaka, wato ya fara aikinsa ne bayan samuwar rayuwa. Shi kansa Darwin bai yi kokarin kutsawa cikin wannan lamari na asalin rai ba, Babban abinda ya sa ka tsarinsa karo da masu addini shine na kawar da hannun Allah cikin samuwar rai. Micheal Ruse ya yi tambaya cewa “Menene ruhi ne? Dutse ba shi da rai, matacciyar saniya ta rasa na ta ran, ni da kai mu na da shi (rai)”

Q17:85 "Su na tambayar ka game da ruhi, ka ce “Ruhi daga al’amarin Ubangiji na ne, kuma ba a baku (kome) ba daga ilimi face kadan"

Wannan tambaya ta Micheal Ruse ta dade a zuciyar mutane kuma a lokacin Annabi Muhammad (SAW) da mutane su ka damu da irin wannan tambaya sai Allah ya saukar da wannan aya da ke tabbatar da cewa duk ilimin da Dan Adam zai samu a game da rai ko ruhi, sai dai ya fahimci kadan daga cikin sirrin domin hurumi ne na Allah ba wanda ya isa ya san wani abu face dan kalilan da Allah ya sanar.

Tarihi ya tabbatar mana da gazawar mutum dangane da bincike kan ruhi, wato an kasa samun wanda zai iya kirkirar rai ko kuma ya fadi yadda ya ke ko daga ina ya ke. Cikin dan ilimin da Allah ya sanar da mu game da ruhi shine fadarsa cikin Qur’ani.

Q15:28-29 "Kuma a lokacin da Ubangijinka ya ce wa Mala’iku “Lalle ni mai hallittar wani jiki ne daga kekasashshen yumbu wanda ya canza. To idan na daidaita shi kuma na hura daga Ruhina a cikinsa, to ku fadi a gareshi kuna masu yin sujada”

Cikin wannan aya sai Allah ya bamu labarin yadda ya fara halitta sannan kuma ya fadi yadda rai ya ke da inda ya samo asali. Wato kamar yadda masana kimiyya bincikensu ya nuna musu cewa rayuwa ta faro daga abubuwa mara sa rai, abinda Allah ya tabbatar mana a nan cewa daga yumbu ne wanda ya bi wasu matakai na canji, ya tsara yadda rayuwa ta fara amma bayan surantawa sai da ya busa ruhinsa ga wannan sura sannan ta fara rayuwa. Wato ruhi ko rai ya samo asali daga ruhin ubangiji, kasancewar Allah ba jiki ba ne don haka sai ruhinsa wanda ya samar da rayukan mu ya kasance da dab’iu irin na kudirar ubangiji yadda bama iya jinsa ko ganinsa balle mu taba shi. Abinda kawai mu ka sani shine cewa mu na iya gane idan akwai shi (rayuwa) ko idan babu shi (mutuwa).

Tun kafin zuwan musulunci, Allah ya bada irin wannan labara cikin Attaura a cikin littafin Farawa inda ya ce

Genesis 2:7 “Ubangiji ya halicci mutum daga kasa sannan ya hura a cikin hancinsa ruhi: Sai ga mutum ya rayu”

Sirrin rayuwa shi ne ta samo asali daga ruhin Ubangiji, kuma ba Adam kawai ya sami wannan busar ruhi ba, duk wata halitta da Allah zai halitta sai ya busa mata wannan ruhi kafin ta fara rayuwa domin shi kadai ke da wannan hurumi.

Allah ya kara tabbatar mana da hakan cikin

Q32:9 “Sannan ya daidaita shi, kuma ya hura a cikinsa daga ruhinsa kuma ya sanya muku ji da gani da zukata”

Wancan kalubale na Ubangiji cewar idan wani na tantamar cewa babu Allah ko kuma ba shi ya halicci komai ba, na nan har gobe. Zuwa yanzu dai mun gamsu da cewa masana kimiyya da su ka fi kowa shahara da wadanda su ka sadaukar da lokacinsu wajen neman yadda za’a iya samun rai daga dakunan bincike, da bakinsu sun karbi gazawarsu. Don haka duk wanda ke son mu yarda cewa babu Allah, abinda zai yi kawai shine ya karbi kalubalen Allah ya samar mana da rai kamar Kuda, idan ya iya yin haka sai mu sallama masa.